રીપોર્ટ@ગુજરાત: વિકાસકાર્યોને વધુ ગતિ આપવા માટે સીએમ ભુપેન્દ્ર પટેલે મહત્વપૂર્ણ સમીક્ષા બેઠક યોજી

અટલ સમાચાર ડોટ કોમ, ડેસ્ક

મુખ્યમંત્રી ભૂપેન્દ્રભાઈ પટેલે રાજ્યના વિકાસકાર્યોને વધુ ગતિ આપવા માટે એક મહત્વપૂર્ણ બજેટલક્ષી સમીક્ષા બેઠક યોજી હતી. ગાંધીનગર ખાતે આયોજિત આ બેઠકમાં નાણાં મંત્રી કનુભાઈ દેસાઈ સહિત વિવિધ વિભાગોના વરિષ્ઠ અધિકારીઓ હાજર રહ્યા હતા. બેઠકનો મુખ્ય હેતુ સરકારી નાણાંનો યોગ્ય ઉપયોગ થાય તે સુનિશ્ચિત કરવાનો હતો.સાથે સાથે વિકાસ યોજનાઓ સમયસર પૂર્ણ થાય તે બાબત પર વિશેષ ધ્યાન કેન્દ્રિત કરવામાં આવ્યું હતું.

મુખ્યમંત્રીએ સ્પષ્ટ સૂચના આપી હતી કે દરેક વિભાગે ફાળવાયેલા બજેટનો ઉપયોગ નિર્ધારિત સમયમર્યાદામાં જ કરવો જરૂરી છે. વહીવટી વિલંબના કારણે ઘણા વિકાસ પ્રોજેક્ટ્સ અટકી જાય છે, જેના કારણે ખર્ચ વધે છે અને લાભ મોડો મળે છે. આ પરિસ્થિતિ ટાળવા માટે વિભાગોને પૂર્વ આયોજન સાથે આગળ વધવા જણાવવામાં આવ્યું. સમયસર નિર્ણય અને કામગીરીથી જનહિતના કામોમાં ઝડપ લાવવાનો ઉદ્દેશ વ્યક્ત કરવામાં આવ્યો હતો.બેઠકમાં મુખ્યમંત્રીએ વિકાસકાર્યોની ગુણવત્તા પર વિશેષ ભાર મૂક્યો હતો. તેમણે જણાવ્યું હતું કે માત્ર કામ પૂર્ણ કરવું પૂરતું નથી, પરંતુ તેની ગુણવત્તા ઉચ્ચતમ હોવી જરૂરી છે.

ખાસ કરીને માર્ગ, પુલ અને જાહેર મકાનો જેવા માળખાકીય પ્રોજેક્ટ્સ માટે નિયમિત ચકાસણી અને ગુણવત્તા નિરીક્ષણ ફરજિયાત બનાવવામાં આવ્યું છે. જો ક્યાંય બેદરકારી જોવા મળે તો કડક કાર્યવાહી કરવાની પણ સૂચના આપવામાં આવી હતી.નાણાં મંત્રી કનુભાઈ દેસાઈની હાજરીમાં વર્તમાન બજેટના ખર્ચની વિસ્તૃત સમીક્ષા કરવામાં આવી હતી. કયા વિભાગે કેટલી ગ્રાન્ટ વાપરી છે અને કયા કામો હજી બાકી છે તેની વિગતવાર માહિતી લેવામાં આવી હતી. સાથે જ આવનારા બજેટમાં નવી જનહિતલક્ષી યોજનાઓ ઉમેરવા અંગે પ્રાથમિક વિચારવિમર્શ થયો હતો. રાજ્યના સર્વાંગી વિકાસને ધ્યાનમાં રાખીને નીતિગત દિશા નક્કી કરવાની ચર્ચા પણ કરવામાં આવી હતી.