રીપોર્ટ@ગુજરાત: વાવ-થરાદ પંથકમાં ભારે વરસાદથી ખેડૂતોને ભારે નુકસાન, 100થી વધુ ખેતરો જળમગ્ન

અટલ સમાચાર ડોટ કોમ, ડેસ્ક

બનાસકાંઠાના વાવ-થરાદ પંથકમાં ભારે વરસાદે ખેડૂતોની ચિંતામાં વધારો કર્યો છે. વાવ અને થરાદ તાલુકા ઉપરાંત ભાભર તાલુકાના ગ્રામ્ય વિસ્તારોમાં પડેલા ધોધમાર વરસાદના કારણે અનેક નીચાણવાળા વિસ્તારોમાં પાણી ભરાઈ જતાં જનજીવન અને ખેતીવાડી પર ગંભીર અસર પહોંચી છે. ખાસ કરીને ભાભર તાલુકાના ખારા અને મીઠા ગામ આસપાસના વિસ્તારોમાં 100થી વધુ ખેતરોમાં વરસાદી પાણી ફરી વળતાં ખેડૂતોને ભારે નુકસાન વેઠવાનો વારો આવ્યો છે. ખેતરોમાં પાણી ભરાવાના કારણે મગફળી અને જુવારના ઉભા પાકને મોટું નુકસાન થયું છે.

ચોમાસાની શરૂઆતમાં જ ખેતરોમાં પાણી ભરાઈ જતાં ખેડૂતો માટે આ સ્થિતિ આર્થિક રીતે પડકારજનક બની છે. ખેડૂતો દ્વારા વાવણી પહેલાં બિયારણ, ખાતર, જમીન તૈયાર કરવા માટેનો ખર્ચ અને ડીઝલ સહિતના વિવિધ ખર્ચ કરવામાં આવ્યા હતા. પરંતુ ભારે વરસાદ બાદ ખેતરોમાં પાણી ભરાઈ જતાં પાકને નુકસાન પહોંચતાં ખેડૂતોની સમગ્ર મહેનત અને વાવણી પાછળ કરાયેલો ખર્ચ જોખમમાં મુકાયો છે.

સ્થાનિક ખેડૂતોના જણાવ્યા અનુસાર, હાલની પરિસ્થિતિને ધ્યાનમાં લેતાં સમગ્ર વિસ્તારના ખેડૂતોને રૂ. 50 લાખથી વધુનું નુકસાન થયું હોવાનો અંદાજ છે. વાસ્તવિક નુકસાનનો આંકડો સરકારી તંત્ર દ્વારા સત્તાવાર સર્વે પૂર્ણ થયા બાદ જ સ્પષ્ટ થઈ શકશે.ભાભરના ખારા અને મીઠા ગામના વિસ્તારોમાં વરસાદી પાણીનો ભરાવો સૌથી મોટી ચિંતાનો વિષય બન્યો છે. સતત વરસાદ અને પાણીના નિકાલની સમસ્યાને કારણે ખેતરોમાંથી પાણી ઝડપથી બહાર ન નીકળતાં ખેતીની જમીન લાંબા સમય સુધી પાણીમાં ડૂબેલી રહેવાની સ્થિતિ સર્જાઈ છે. 

કેટલાક ખેતરોમાં પાક સંપૂર્ણપણે પાણીમાં ગરકાવ થઈ ગયો હોવાનું ખેડૂતો જણાવી રહ્યા છે. સૌથી મોટી મુશ્કેલી એ છે કે વાવણીની શરૂઆતના તબક્કામાં જ પાકને નુકસાન થયું છે. મગફળી અને જુવારના પાક માટે ખેડૂતોએ અગાઉથી જમીન તૈયાર કરી હતી અને બિયારણ, ખાતર તથા અન્ય ખેતી ખર્ચ કર્યા હતા. હવે જો ખેતરમાં ભરાયેલું પાણી લાંબા સમય સુધી ન ઓસરે તો પાક બચાવવાની શક્યતા પણ ઘટી શકે છે. આવી સ્થિતિમાં ખેડૂતોને એક તરફ ચાલુ સિઝનના પાકનું નુકસાન ભોગવવું પડી શકે છે, તો બીજી તરફ ફરીથી વાવણી કરવાની ફરજ પડે તો વધારાનો ખર્ચ પણ કરવો પડી શકે છે. ખારા અને મીઠા ગામ આસપાસ 100થી વધુ ખેતરોમાં પાણી ભરાયું છે. કેટલાક વિસ્તારોમાં ખેતરો અને આસપાસના રસ્તાઓ વચ્ચેનો તફાવત પણ સ્પષ્ટ ન રહે તેવી સ્થિતિ સર્જાઈ હોવાનું સ્થાનિકોનું કહેવું છે. પાણીના ભરાવાને કારણે ખેતીની કામગીરી પણ અટકી ગઈ છે અને ખેડૂતો ખેતરોમાં જઈને પાકની સ્થિતિનું નિરીક્ષણ કરી શકતા નથી.

ખેતરોમાં પાણી ભરાવાની સમસ્યા માત્ર પાકના નુકસાન પૂરતી મર્યાદિત નથી. લાંબા સમય સુધી પાણી ભરાયેલું રહે તો જમીનની ગુણવત્તા અને આગામી ખેતીની કામગીરી પર પણ અસર થઈ શકે છે.વરસાદથી થયેલા નુકસાનને પગલે અસરગ્રસ્ત ખેડૂતો હવે સરકાર અને વહીવટી તંત્ર તરફ આશાભરી નજરે જોઈ રહ્યા છે. ખેડૂતોની મુખ્ય માગ છે કે અસરગ્રસ્ત વિસ્તારોમાં તાત્કાલિક સર્વે હાથ ધરવામાં આવે અને ખેતરવાર નુકસાનનું યોગ્ય મૂલ્યાંકન કરવામાં આવે. પાકના નુકસાનની વાસ્તવિક સ્થિતિ સામે આવે તે માટે અધિકારીઓ દ્વારા સ્થળ પર જઈને તપાસ કરવામાં આવે તેવી પણ માગ ઉઠી છે.