રીપોર્ટ@દેશ: આજે 'ભારત બંધ'ના એલાન વચ્ચે રાજ્યભરમાં બેંકિંગ સેવાઓ સંપૂર્ણપણે ઠપ્પ થવાની સંભાવના

અટલ સમાચાર ડોટ કોમ, ડેસ્ક

આજે 'ભારત બંધ'ના એલાનને કારણેે ગુજરાતભરમાં બેંકિંગ કામગીરી સંપૂર્ણપણે ઠપ્પ થવાની સંભાવના છે. રાજ્યભરની રાષ્ટ્રીયકૃત અને પસંદગીની ખાનગી ક્ષેત્રની બેંકોના 20,000 થી વધુ કર્મચારીઓ આ રાષ્ટ્રવ્યાપી હડતાળમાં ભાગ લઈ રહ્યા છે. જાહેર ક્ષેત્રની બેંકો બંધ રહેવાથી રાજ્યમાં અંદાજે ₹15,000 કરોડના નાણાકીય વ્યવહારો પ્રભાવિત થશે.આ હડતાળથી જાહેર અને ખાનગી ક્ષેત્રની બેંક શાખાઓમાં રોકડ વ્યવહારો, ચેક ક્લિયરન્સ અને ગ્રાહક સેવાઓ જેવી દૈનિક કામગીરીમાં ગંભીર વિક્ષેપ પડવાની શક્યતા છે. મહા ગુજરાત બેંક કર્મચારી સંગઠનના જણાવ્યા અનુસાર, આ વિરોધ પ્રદર્શન કેન્દ્ર સરકારની 'કામદાર વિરોધી' શ્રમ સુધારાઓ અને 'જનતા વિરોધી' આર્થિક નીતિઓ સામે કરવામાં આવી રહ્યું છે.

ગુજરાતભરમાં આવેલી રાષ્ટ્રીયકૃત બેંકોની 3,678 શાખાઓના કર્મચારીઓ આ હડતાળમાં જોડાવાની અપેક્ષા છે. આ ઉપરાંત, ફેડરલ બેંક, કરુર વૈશ્ય બેંક અને IDBI બેંક જેવી કેટલીક ખાનગી ક્ષેત્રની બેંકોના કર્મચારીઓએ પણ આ આંદોલનને પોતાનો ટેકો જાહેર કર્યો છે. આ બંધનું એલાન 10 કેન્દ્રીય ટ્રેડ યુનિયનોના સંયુક્ત મંચ દ્વારા આપવામાં આવ્યું છે, જેને વિવિધ ખેડૂતો અને ગ્રામીણ કામદાર સંગઠનોનું પણ સમર્થન પ્રાપ્ત છે. આ વિરોધ પ્રદર્શનનો મુખ્ય હેતુ કેન્દ્ર સરકારની કોર્પોરેટ-કેન્દ્રિત અને આયોજકો દ્વારા 'કામદાર વિરોધી' ગણાવાતી નીતિઓનો જોરદાર વિરોધ કરવાનો છે.