રિપોર્ટ@દેશ: વડાપ્રધાન મોદીનો વિપક્ષ પર પ્રહાર, 'કોંગ્રેસ એવી પાર્ટી છે જે સમર્થન આપનારને સુકવી નાખે છે'

અટલ સમાચાર ડોટ કોમ, ડેસ્ક

વડાપ્રધાન નરેન્દ્ર મોદીએ કૉંગ્રેસને એવી 'વેલો' ગણાવી કે જેનું પોતાનું કોઈ મૂળ કે જમીન નથી અને જે તેને ટેકો આપે છે તે જ સુકાઈ જાય છે. મહારાષ્ટ્રના મરાઠવાડા વિસ્તારમાં પરભણીમાં એક રેલીને સંબોધતા મોદીએ કહ્યું કે 2024ની લોકસભા ચૂંટણી ભારતને વિકસિત અને આત્મનિર્ભર દેશ બનાવવાની છે. તેમણે કહ્યું કે ભારતે માત્ર 10 વર્ષમાં વિકાસની લાંબી સફર કરી છે. તેઓએ કહ્યું કે ભારતને ત્રીજી સૌથી મોટી અર્થવ્યવસ્થા બનાવવાની આ ચૂંટણી છે.

મુખ્ય વિપક્ષી પાર્ટી કોંગ્રેસ પર નિશાન સાધતા તેમણે કહ્યું હતું કે, "કોંગ્રેસ એક વેલો છે જેના પોતાના મૂળ કે જમીન નથી. જે તેને ટેકો આપે છે તેને તે સૂકવી નાખે છે.” વડાપ્રધાને ભારતીય જનતા પાર્ટીના ઢંઢેરાને મોદીનું ગેરંટી કાર્ડ ગણાવ્યું. તેઓએ કહ્યું કે તેઓ ગરીબોનું દર્દ સમજે છે અને સરકાર દેશમાં ગરીબો માટે ત્રણ કરોડ ઘર બનાવશે. તેમણે રેલીમાં હાજર લોકોને કહ્યું, “તમારા સપના મારા સપના છે.”આ બેઠક પર સત્તાધારી મહાયુતિના ઉમેદવાર મહાદેવ જાનકરનો સામનો શિવસેના સાંસદ સંજય જાધવ સાથે છે. મોદીએ દરેક મતદાન મથક પર પાર્ટી કાર્યકર્તાઓને જીતવા માટે આહ્વાન કર્યું અને કહ્યું કે આ માટે તેઓએ દરેકના દિલ જીતવા પડશે.