રીપોર્ટ@વલસાડ: વન્યજીવ અંગોના ગેરકાયદેસર વેપાર સામે કાર્યવાહી, દીપડાના બચ્ચાની ચામડી સાથે 3 ઝડપાયા

અટલ સમાચાર ડોટ કોમ, ડેસ્ક

ગુજરાત વન વિભાગ અને વાઇલ્ડલાઇફ ક્રાઇમ કંટ્રોલ બ્યુરો દ્વારા હાથ ધરવામાં આવેલા સંયુક્ત ઓપરેશનમાં દીપડાના બચ્ચાની ચામડી સહિતના વન્યજીવ અંગો સફળતાપૂર્વક જપ્ત કરીને આ બાબતે ત્રણ ગુનેગારોની ધરપકડ કરવામાં આવી છે. આ કાર્યવાહી વલસાડ ઉત્તર વન વિભાગ, વલસાડ દક્ષિણ વન વિભાગ અને વાઇલ્ડલાઇફ ક્રાઇમ કંટ્રોલ બ્યુરો (WCCB) ની સંકલિત ટીમો દ્વારા હાથ ધરવામાં આવી હતી. સંયુક્ત પ્રયાસો આ પ્રદેશમાં વન્યજીવ સંબંધિત ગુનાઓને રોકવામાં વન વિભાગની મજબૂત પ્રતિબદ્ધતા અને સતર્કતા દર્શાવે છે. ભારતના મૂલ્યવાન વન્યજીવોના રક્ષણ- સંવર્ધન માટે ગુજરાત વન વિભાગ સમર્પિત રીતે કામગીરી કરી રહ્યું છે અને આ મિશન માટે સંપૂર્ણપણે પ્રતિબદ્ધ છે.

વન્યજીવ વસ્તુઓનો ગેરકાયદેસર વેપાર વન્યજીવ અધિનિયમ, 1972 હેઠળ એક ગંભીર ગુનો છે, જેમાં 1 લાખ સુધીનો દંડ અને સાત વર્ષ સુધીની જેલની સજા થઈ શકે છે. આ કેસમાં લવકર રેન્જે વન્યજીવ (સંરક્ષણ) અધિનિયમ, 1972ની કલમ 2, 9, 39 અને 50 હેઠળ ગુનો નોંધ્યો છે. વન વિભાગ સમગ્ર ષડયંત્રનો પર્દાફાશ કરવા અને તેમાં સંડોવાયેલા તમામ ગુનેગારોની ઓળખ કરવા માટે વધુ તપાસ કરી રહ્યું છે. વન વિભાગે આ કાર્યવાહી દ્વારા વન્યજીવ સંબંધિત ગુનાઓ સામે તેનું મક્કમ વલણ દર્શાવ્યું છે.