રીપોર્ટ@વર્લ્ડ: PM મોદીની ઓસ્ટ્રેલિયા મુલાકાત દરમિયાન થઈ અનેક મોટી જાહેરાતો

અટલ સમાચાર ડોટ કોમ, ડેસ્ક

વડાપ્રધાન નરેન્દ્ર મોદી બે દિવસીય ઓસ્ટ્રેલિયા પ્રવાસે પહોંચ્યા છે, જ્યાં તેમણે મેલબર્નમાં આયોજિત CEO ફોરમને સંબોધિત કર્યું. આ દરમિયાન ભારત અને ઓસ્ટ્રેલિયા વચ્ચે વેપાર, શિક્ષણ, સ્વચ્છ ઊર્જા અને રોકાણને લઈને અનેક મહત્વપૂર્ણ જાહેરાતો કરવામાં આવી. ખાસ કરીને ઓસ્ટ્રેલિયાએ ગુજરાતમાં મોટું રોકાણ કરવાની અને બે જાણીતી યુનિવર્સિટીના કેમ્પસ શરૂ કરવાની જાહેરાત કરી છે.

ઓસ્ટ્રેલિયાના વડાપ્રધાન એન્થોની અલ્બનીઝે જાહેરાત કરી કે ઓસ્ટ્રેલિયાનું વરિષ્ઠ વેપાર પ્રતિનિધિમંડળ ડિસેમ્બરમાં ભારતની મુલાકાત લેશે. આ દરમિયાન ઓસ્ટ્રેલિયાની પ્રતિષ્ઠિત વોલોંગોંગ યુનિવર્સિટી અને ડીકિન યુનિવર્સિટી ગુજરાતમાં પોતાના કેમ્પસ શરૂ કરશે. આ પહેલ ભારત-ઓસ્ટ્રેલિયા વચ્ચે શિક્ષણ અને કૌશલ્ય વિકાસના સહકારને નવી દિશા આપશે. પીએમ મોદીએ કહ્યું કે હવે વિદ્યાર્થી વિનિમયને માત્ર શિક્ષણ સુધી સીમિત રાખવાના બદલે તેને "ટેલેન્ટ પાર્ટનરશિપ"માં પરિવર્તિત કરવાની જરૂર છે.

પીએમ મોદીએ જણાવ્યું કે વર્ષ 2022માં અમલમાં આવેલા Economic Cooperation and Trade Agreement (ECTA) બાદ બંને દેશો વચ્ચેના વેપારમાં નોંધપાત્ર વધારો થયો છે. ભારતમાંથી ઓસ્ટ્રેલિયા તરફના નિકાસમાં વધારો નોંધાયો છે અને બંને દેશોના ઉદ્યોગોને નવા બજારોમાં પ્રવેશ મળ્યો છે. છેલ્લા ચાર વર્ષમાં ભારત-ઓસ્ટ્રેલિયા વચ્ચેનો વેપાર લગભગ બમણો થયો છે. વર્ષ 2020-21માં બંને દેશો વચ્ચેનો વેપાર લગભગ 4 અબજ અમેરિકન ડોલર હતો, જે 2024-25માં વધીને અંદાજે 8.5 અબજ અમેરિકન ડોલર સુધી પહોંચ્યો છે.પીએમ મોદીએ જણાવ્યું કે ભારત ગ્રીન હાઇડ્રોજન, સોલાર મોડ્યુલ, વિન્ડ ટર્બાઇન અને હાઇડ્રો પ્રોજેક્ટ્સ માટે મજબૂત ઉત્પાદન ઇકોસિસ્ટમ તૈયાર કરી રહ્યું છે.

ભારતે વર્ષ 2030 સુધી 500 ગીગાવોટ રિન્યુએબલ એનર્જી ક્ષમતા હાંસલ કરવાનો અને વર્ષ 2070 સુધી નેટ ઝીરો ઉત્સર્જનનું લક્ષ્‍ય નક્કી કર્યું છે. ઉપરાંત 2047 સુધી 100 ગીગાવોટ ન્યૂક્લિયર એનર્જી ક્ષમતા વિકસાવવાનું પણ લક્ષ્‍ય રાખવામાં આવ્યું છે. પીએમ મોદીએ જણાવ્યું કે ઓસ્ટ્રેલિયા પાસે યુરેનિયમના વિશાળ ભંડાર છે, જે ભારતના ન્યૂક્લિયર ઊર્જા કાર્યક્રમ માટે મહત્વપૂર્ણ બની શકે છે.

પીએમ મોદીએ ઓસ્ટ્રેલિયાના રોકાણકારોને ભારતના બંદરો, એરપોર્ટ, માર્ગો, રેલવે અને શહેરી વિકાસ જેવા ક્ષેત્રોમાં રોકાણ માટે આમંત્રણ આપ્યું. તેમણે જણાવ્યું કે ભારતના ઝડપી વિકાસમાં લાંબા ગાળાના રોકાણકારો માટે વિશાળ તકો ઉપલબ્ધ છે.પીએમ મોદીએ કહ્યું કે ભારત અને ઓસ્ટ્રેલિયાનો સહકાર માત્ર બંને દેશોની રાજધાનીઓ સુધી મર્યાદિત ન રહે, પરંતુ રાજ્યો, શહેરો, યુનિવર્સિટીઓ અને ઉદ્યોગો વચ્ચે પણ મજબૂત ભાગીદારી વિકસાવવી જોઈએ.તેમણે રાજ્ય-થી-રાજ્ય અને ક્ષેત્ર-થી-ક્ષેત્ર સહયોગ વધારવા માટે નવી વ્યૂહરચના બનાવવાની પણ સલાહ આપી.

ઓસ્ટ્રેલિયાના મેલબર્ન પહોંચતા જ ભારતીય સમુદાયે પીએમ મોદીનું ભવ્ય સ્વાગત કર્યું. આ પ્રસંગે સંગીતમય કાર્યક્રમોનું આયોજન કરવામાં આવ્યું હતું, જેમાં ભારતીય અને ઓસ્ટ્રેલિયન કલાકારોએ રજૂઆત કરી હતી. પીએમ મોદીએ ભારતીય સમુદાયના સભ્યો સાથે મુલાકાત કરી અને તેમના યોગદાનની પ્રશંસા કરી.ઓસ્ટ્રેલિયા દ્વારા ગુજરાતમાં યુનિવર્સિટી કેમ્પસ સ્થાપવાની જાહેરાત રાજ્યને વૈશ્વિક શિક્ષણ કેન્દ્ર તરીકે વધુ મજબૂત બનાવશે. સાથે જ વેપાર, સ્વચ્છ ઊર્જા અને ઈન્ફ્રાસ્ટ્રક્ચરમાં વધતું રોકાણ ભારત-ઓસ્ટ્રેલિયા સંબંધોને નવી ઊંચાઈ પર લઈ જશે.