કૌભાંડ@ધ્રાંગધ્રા: મેથાણમાં બનાસકાંઠાના દંપતિએ 1 કરોડથી વધુનું રોકાણ કરાવી છેતરપીંડી આચરી

અટલ સમાચાર ડોટ કોમ, ડેસ્ક

ધ્રાંગધ્રા તાલુકાના એક માત્ર મેથાણ ગામમાંથી બનાસકાંઠાના દંપતિએ પ્રસિધ્ધિ નિર્માણ કો-ઓ.માં સારૂ વળતરના નામે અંદાજે રૂા.૧ કરોડથી વધુનું રોકાણ કરાવી છેતરપીંડિ આચરી ભૂગર્ભમાં ઉતરી જતાં ચકચાર મચી છે. સુરેન્દ્રનગર અને બનાસકાંઠા જિલ્લામાં કંપનીની ઓફિસમાં તાળા મારી દંપતિ ભૂગર્ભમાં ઉતરી ગયા છે. મેથાણ ગામે રહેતી મહિલાઓ અને વૃધ્ધોને ગામમાં જ રહેતી ત્રણ મહિલા એજન્ટો ઈન્દુબેન, સુશીલાબેન અને સવિતાબેનએ પાલનપુર ખાતે હેડ ઓફીસ અને ધ્રાંગધ્રા શહેરી વિસ્તારમાં પણ તેની બ્રાન્ચ ધરાવતી પ્રસિધ્ધી નિર્માણ મલ્ટી સ્ટેટ ગૃપ હાઉસીંગ કો-ઓપરેટીવ સોસાયટી લીમીટેડ કંપનીમાં માસીક રોકાણ કરવાની વાત કરી હતી અને અલગ-અલગ રકમ દર મહિને જમા કરાવવાનું જણાવ્યું હતું તેમજ ૬ વર્ષની મુદ્દત સુધી રૂપિયા જમા કરાવ્યા બાદ વ્યાજ સાથે વધુ રકમ તેમજ લોન, મકાન સહિતની ચીજવસ્તુઓ કંપની દ્વારા આપવામાં આવશે તેવી લોભામણી વાતો કરી હતી.

આથી મહિલા એજન્ટોના વિશ્વાસમાં આવી મેથાણ ગામની અંદાજે ૯૦થી વધુ મહિલાઓએ પોતાની બચતના તેમજ પરચુરણ કામ દ્વારા એકત્ર કરેલ આવક અંદાજે ૬-૭ વર્ષ પહેલા એજન્ટ મારફતે કંપનીમાં જમા કરાવવાનું શરૂ કર્યું હતું. જેમાં ગામની અમુક મહિલાઓ દર મહિને ૫૦૦ તેમજ અમુક મહિલાઓ દર મહિને ૧૦૦૦ રૂપિયા જમા કરાવતી હતી જેની એજન્ટો દ્વારા દર મહિને જમા કરાવ્યાની પહોંચ પણ રોકાણકારોને આપવામાં આવતી હતી. આમ ગામની મહિલાઓએ રૂપિયા ૫૦૦ લેખે ૬ વર્ષ માટે રૂા.૩૬,૦૦૦ પ્રતિ મહિલા દીઠ અને રૂા.૧,૦૦૦ લેખે ૬ વર્ષના રૂા.૭૨,૦૦૦ પ્રતિ મહિલા દીઠ પ્રસિધ્ધિ નિર્માણ કંપનીમાં જમા કરાવતા હતા. જ્યારે મહિલા એજન્ટો દ્વારા રકમ જમા કરાવનાર મહિલાઓને ૬ વર્ષની મુદ્દત પૂર્ણ થયા બાદ રૂપિયા ૩૬,૦૦૦ના રૂા.૪૯,૫૦૦ અને રૂા.૭૨,૦૦૦ના રૂા.૯૮,૫૦૦ પરત આપવામાં આવશે તેમ જણાવ્યું હતું.

ગામની મહિલા રોકાણકારોએ એજન્ટ પાસે નક્કી થયા મુજબ ભરેલી રકમ વ્યાજ સાથે પરત માંગતા છેલ્લા ૬-૭ મહિનાથી મહિલા એજન્ટો બહાના બતાવી ગલ્લા-તલ્લા કરતા હતા અને કંપની દ્વારા રકમ ચુકવી દેવામાં આવશે તેવી અવાર-નવાર ખાત્રી આપવામાં આવતી હતી. જ્યારે અનેક વખત ભોગ બનનાર મહિલાઓએ એજન્ટો પાસે ઉધરાણી કરવા છતાં કોઈ જ ઉકેલ ન આવતા મહિલાઓએ ધ્રાંગધ્રા શહેરી વિસ્તારમાં આવેલી કંપનીની બ્રાન્ચ ઓફિસનો સંપર્ક કરતા ત્યાં ઓફિસને તાળા મારી બોર્ડ ઉતારી જવાબદાર સ્થાનિક અધિકારીઓ રફુચક્કર થઈ ચુક્યા હતા. ત્યાર બાદ મહિલાઓએ ગામમાં રહેતી મહીલા એજન્ટનો સંપર્ક કરતા તેઓએ આ મામલે ધ્રાંગધ્રા તાલુકા પોલીસ મથકે કંપનીના ડિરેકટરો અને મુખ્ય સંચાલકો સામે છેતરપીંડી અંગે લેખિત અરજી કરી હોવાનું જણાવી પોતાની જવાબદારીથી હાથ ઉંચા કરી લીધા હતા.

આમ ધ્રાંગધ્રા તાલુકાના એક જ ગામમાં હાલ વધુ એક કંપની દ્વારા કરોડોનું કૌભાંડ બહાર આવ્યું છે ત્યારે જિલ્લામાં અન્ય ગામોમાં પણ આ અંગે તપાસ કરવામાં આવે તો છેતરપીંડિનો આંક કરોડોને પાર પહોંચે તેવી શક્યતાઓ સેવાઈ રહી છે. હાલ માત્ર મેથાણ ગામમાંથી જ ૯૦થી વધુ મહિલાઓને કંપનીમાં રોકાણ કરાવી અંદાજે રૂા.૧ કરોડથી વધુનું છેતરપીંડી કૌભાંડ બહાર આવ્યું છે જ્યારે જિલ્લાના અન્ય ગામોમાં પણ તપાસ કરવામાં આવે તો છેતરપીંડીની રકમ કરોડોને પાર પહોંચવાની શક્યતાઓ સેવાઈ રહી છે.