કૌભાંડ@સાબરકાંઠા: કથાના બહાને લાખો રૂપિયા ઉઘરાવી છેતરપિંડી, 15થી વધુ ગામના ભક્તો ભોગ બન્યા
અટલ સમાચાર ડોટ કોમ, ડેસ્ક
સાબરકાંઠા જિલ્લામાં એક મોટી છેતરપિંડીનો બનાવ સામે આવ્યો છે. શ્રદ્ધાળુઓને હરિદ્વાર ખાતે કથા કરાવવાના બહાને લાખો રૂપિયા પડાવી લેવામાં આવ્યા છે. આ છેતરપિંડીનો મુખ્ય ભોગ ઇડર તાલુકાનું દરામલી ગામ બન્યું છે, જ્યાંના અંદાજે 350 લોકો સાથે આ ફ્રોડ થયું છે. કથાના આયોજકો, જેમના નામ કિશન અને લાલભાઇ હોવાનું જાણવા મળ્યું છે, તેમણે દરેક વ્યક્તિ પાસેથી રૂપિયા 3500 જેટલી રકમ ઉઘરાવી હતી.નક્કી કરેલી તારીખે કથા કે આયોજન શરૂ ન થતાં અને આયોજકોનો સંપર્ક ન થતાં, લોકોને છેતરાયા હોવાનો ખ્યાલ આવ્યો હતો.
આ છેતરપિંડી માત્ર દરામલી ગામ પૂરતી સીમિત નથી. પોલીસ તપાસમાં સામે આવ્યું છે કે આ ઠગ ટોળકીએ સાબરકાંઠા, બનાસકાંઠા અને અમદાવાદ જિલ્લાના 15થી વધુ અલગ-અલગ ગામોના શ્રદ્ધાળુઓને નિશાન બનાવ્યા હતા. ધાર્મિક આયોજનના નામે ગામડે-ગામડે ફરીને તેમણે મોટી સંખ્યામાં ભક્તો પાસેથી નાણાં ઉઘરાવ્યા હતા, જેના કારણે છેતરાયેલા લોકોની કુલ સંખ્યા અને છેતરપિંડીની રકમ ઘણી મોટી હોવાની શક્યતા છે. આયોજકો કિશન અને લાલભાઇએ વિશ્વાસપાત્ર વાતાવરણ ઊભું કરીને લોકોને સરળતાથી ભોળવી દીધા હતા. આ છેતરપિંડીની હદ અને વ્યાપ જોતાં, આ માત્ર બે વ્યક્તિઓનું નહીં પણ એક આખી ટોળકીનું કામ હોવાનું અનુમાન છે, જેમણે વ્યવસ્થિત રીતે આ કૌભાંડ આચર્યું હતું.
સમગ્ર કૌભાંડનો પર્દાફાશ થતાં જ, મુખ્ય આરોપી આયોજકો કિશન અને લાલભાઇ બંને ફરાર થઈ ગયા છે. દરામલી ગામના ભોગ બનેલા લોકો દ્વારા તાત્કાલિક પોલીસનો સંપર્ક કરવામાં આવ્યો હતો અને તમામ વિગતો સાથે ફરિયાદ નોંધાવવામાં આવી છે. પોલીસે આ મામલાની ગંભીરતાને ધ્યાનમાં રાખીને તુરંત કાર્યવાહી હાથ ધરી છે. જુદા જુદા જિલ્લાના શ્રદ્ધાળુઓને નિશાન બનાવવામાં આવ્યા હોવાથી, પોલીસે ફરાર આયોજકોને ઝડપી પાડવા માટે અલગ-અલગ ટીમો બનાવીને તપાસના ચક્રો ગતિમાન કર્યા છે.
