કૌભાંડ@રાજકોટ: જસદણમાં બાળકો વેચવાના કૌભાંડનો પર્દાફાશ થતાં મચી ચકચાર

અટલ સમાચાર ડોટ કોમ, ડેસ્ક

રાજકોટના જસદણમાં સગીરાને અધૂરા મહિને પ્રસૂતિ કરાવીને બાળક વેચી દેવામાં આવતા આ કૌભાંડનો પર્દાફાશ થયો હતો. ડોક્ટર રાદડિયાએ સગીરાને અધૂરા મહિને જન્મેલા બાળકને વેચી દીધુ હોવાની વાતનો ઘટસ્ફોટ થયો છે. આ કેસમાં ખૂલેલા એક પછી એક પત્તામાં ડોક્ટરે અગાઉ બે બાળકોને વેચ્યાનો પણ ચોંકાવનારો ખુલાસો થયો છે.પોલીસે આ કેસની સઘન તપાસ હાથ ધરવાનું શરૂ કરતા બાળકો કોને વેચાયા છે તેની માહિતી પોલીસને મળી છે. બાળકોના વેચાણની વાત બહાર આવતા પોલીસે આ કેસમાં સઘન તપાસ શરૂ કરી છે.

પોલીસ ડોક્ટરની પૂછપરછ કરી રહી છે અને બાળકોને વેચવાના કૌભાંડના એક પછી એક અંકોડા મેળવી રહી છે.પોલીસને શંકા છે કે આ કૌભાંડ કદાચ ગુજરાત પૂરતુ સીમિત નથી, આ કૌભાંડ આંતરરાજ્ય પણ હોઈ શકે છે. તેની પાછળનું કારણ એ છે કે આવા કૌભાંડમાં જે રાજ્યમાં ચોરાયેલા બાળકો હોય તેનું તે રાજ્યમાં વેચાણ થતું નથી બીજા રાજ્યમાં વેચાણ થાય છે. તેથી પોલીસ આ કેસમાં આંતરરાજ્ય ગેંગની સંડોવણીની સંભાવના ચકાસી રહી છે.