અપડેટ@દેશ: ભારત અને પાકિસ્તાન વચ્ચે યુદ્ધ વિરામ લાગુ, સાંજે 5 વાગ્યાથી અમલ શરૂ

અટલ સમાચાર ડોટ કોમ, ડેસ્ક

ભારત પાકિસ્તાન વચ્ચે ચાલી રહેલો ભીષણ તણાવ હવે સમાપ્ત થવા જઈ રહ્યો છે. આ ક્ષેત્ર માટે એક મોટા અને રાહતભર્યા સમાચાર સામે આવ્યા છે, જેમાં ભારત સરકારે સત્તાવાર રીતે પાકિસ્તાન સાથે યુદ્ધ વિરામની પુષ્ટિ કરી છે.મળતી માહિતી મુજબ, ભારત સરકારે શનિવારે સાંજે સત્તાવાર રીતે પુષ્ટિ કરી છે કે ભારત અને પાકિસ્તાન વચ્ચે યુદ્ધ વિરામ લાગુ કરવામાં આવ્યો છે. આ યુદ્ધ વિરામનો અમલ આજે સાંજે 5 વાગ્યાથી શરૂ થઈ ગયો છે.

આ નિર્ણય સાથે બંને દેશો વચ્ચે તાજેતરમાં વધેલા સૈન્ય તણાવનો અંત આવવાની આશા સેવાઈ રહી છે. અમેરિકાના પૂર્વ રાષ્ટ્રપતિ ડોનાલ્ડ ટ્રંપે સોશિયલ મીડિયા પર દાવો કર્યો હતો કે ભારત અને પાકિસ્તાન યુદ્ધ વિરામ માટે તૈયાર છે. અને આ દાવાને ભારતીય સરકારી સૂત્રો દ્વારા પણ પુષ્ટિ મળી હતી. ભારત સરકાર દ્વારા સત્તાવાર જાહેરાત સાથે, આંતરરાષ્ટ્રીય સ્તરે ચાલી રહેલા મધ્યસ્થતાના પ્રયાસો અને શાંતિ સ્થાપવાની ઈચ્છાનું સકારાત્મક પરિણામ જોવા મળી રહ્યું છે. આ યુદ્ધ વિરામથી સરહદી વિસ્તારોમાં શાંતિ સ્થપાશે અને બંને દેશો વચ્ચેના સંબંધોમાં સુધારો થવાની સંભાવના છે. સરહદ પર તૈનાત બંને દેશોના દળોને યુદ્ધ વિરામનું પાલન કરવા માટેના આદેશો આપી દેવામાં આવ્યા છે.