હવામાન@દેશ: આગામી 72 કલાક દરમિયાન 19 રાજ્યોમાં ભારે વરસાદ-વાવાઝોડાનો ખતરો

અટલ સમાચાર ડોટ કોમ, ડેસ્ક

દેશભરમાં હવામાનની સ્થિતિ ઝડપથી બદલાઈ રહી છે. ભારતીય હવામાન વિભાગ દ્વારા જાહેર કરવામાં આવેલી તાજી આગાહી મુજબ આગામી 24થી 72 કલાક દરમિયાન અનેક રાજ્યોમાં વરસાદ, તેજ પવન અને વીજળી પડવાની ઘટનાઓ જોવા મળી શકે છે. ચોમાસું પણ હવે વધુ વિસ્તારોમાં આગળ વધી રહ્યું હોવાથી હવામાન વિભાગે સાવચેત રહેવાની સલાહ આપી છે. દેશના 19 રાજ્યોમાં હવામાન અચાનક ઉગ્ર સ્વરૂપ ધારણ કરી શકે છે. કેટલાક વિસ્તારોમાં 80થી 90 કિમી પ્રતિ કલાકની ઝડપે પવન ફૂંકાવાની સંભાવના વ્યક્ત કરવામાં આવી છે.

ભારે વરસાદ ઉપરાંત આંધી, વંટોળ અને વીજળી પડવાની ઘટનાઓ પણ બની શકે છે.ખાસ કરીને ખેડૂતો માટે આગામી દિવસો મહત્વપૂર્ણ માનવામાં આવી રહ્યા છે. તેજ પવન અને સંભવિત કરાવર્ષાને કારણે ઉભા પાકને નુકસાન પહોંચવાની આશંકા વ્યક્ત કરવામાં આવી છે.હવામાન વિભાગના જણાવ્યા મુજબ દક્ષિણ અને પૂર્વ ભારતના વિસ્તારોમાં ચોમાસું વધુ સક્રિય બની રહ્યું છે. બીજી તરફ ઉત્તર અને મધ્ય ભારતના કેટલાક વિસ્તારોમાં હજુ પણ ગરમીનો પ્રભાવ યથાવત છે.

આગામી 48 કલાક દરમિયાન મધ્યપ્રદેશમાં ચોમાસાના આગમનની સંભાવના વ્યક્તમોનમા આવી છે. જ્યારે ઉત્તર પ્રદેશ, બિહાર અને ઝારખંડમાં ચક્રવાતી પરિભ્રમણ ના કારણે વરસાદી અને વાવાઝોડા જેવી પરિસ્થિતિ સર્જાઈ શકે છે. પહાડી રાજ્યોમાં ભૂસ્ખલન અને વાદળ ફાટવાની ઘટનાઓની સંભાવનાને ધ્યાનમાં રાખીને સ્થાનિક તંત્ર એલર્ટ પર છે.

ગુજરાત માટેની આગાહી મુજબ આગામી સાત દિવસ દરમિયાન મહત્તમ તાપમાનમાં કોઈ મોટો ફેરફાર થવાની શક્યતા નથી. આજે મુખ્યત્વે દક્ષિણ ગુજરાતના વિસ્તારોમાં વરસાદની સંભાવના વ્યક્ત કરવામાં આવી છે, જ્યારે રાજ્યના અન્ય મોટાભાગના વિસ્તારોમાં હવામાન શુષ્ક રહેવાની આગાહી છે. હવામાન વિભાગના અનુમાન પ્રમાણે રાજ્યમાં 21 જૂન સુધી વરસાદી પ્રવૃત્તિઓ ચાલુ રહી શકે છે. 17 જૂનથી વરસાદની તીવ્રતામાં વધારો થવાની શક્યતા છે. સાથે જ દક્ષિણ સૌરાષ્ટ્રના કેટલાક વિસ્તારોમાં પણ વરસાદ નોંધાઈ શકે છે.

IMDએ જણાવ્યું છે કે 15 જૂન, 2026ના રોજ નૈઋત્યનું ચોમાસું આંધ્રપ્રદેશ, પશ્ચિમ બંગાળ અને પશ્ચિમ-મધ્ય બંગાળની ખાડીના બાકીના વિસ્તારો ઉપરાંત તેલંગાણા, ઓડિશા, ઝારખંડ અને બિહારના વધુ કેટલાક ભાગોમાં આગળ વધ્યું છે. હાલ ચોમાસાની ઉત્તરીય સીમા  હરનાઈ, સોલાપુર, હૈદરાબાદ, ભદ્રાચલમ, કોરાપુટ, ફૂલબની, રાંચી, જમુઈ અને મુઝફ્ફરપુર સહિતના વિસ્તારોમાંથી પસાર થઈ રહી છે.

હવામાન વિભાગના જણાવ્યા મુજબ આગામી 4થી 5 દિવસ દરમિયાન મધ્ય અરબી સમુદ્ર, મહારાષ્ટ્રના વધુ વિસ્તારો, કર્ણાટક, તેલંગાણા, ઓડિશા, ઝારખંડ, બિહાર અને છત્તીસગઢના કેટલાક ભાગોમાં ચોમાસું વધુ આગળ વધવા માટે અનુકૂળ પરિસ્થિતિઓ સર્જાઈ રહી છે.