હવામાન@દેશ: ગુજરાત સહિત 18 રાજ્યોમાં ચોમાસું જામશે, લોકોને બિનજરૂરી પ્રવાસ ટાળવા સલાહ

અટલ સમાચાર ડોટ કોમ, ડેસ્ક

આજે 13 જુલાઈએ દેશના ઘણા વિસ્તારોમાં હળવાથી મધ્યમ અને કેટલાક ભાગોમાં ભારેથી અતિ ભારે વરસાદની સંભાવના છે. હવામાન વિભાગે પહાડી વિસ્તારોમાં ભૂસ્ખલન અને નીચાણવાળા વિસ્તારોમાં પૂરના ખતરાને જોતાં લોકોને બિનજરૂરી મુસાફરી ટાળવા માટે જણાવ્યું છે. પશ્ચિમ અને દક્ષિણ ભારતમાં સોમવારે ચોમાસાની ગતિવિધિઓ ચાલુ રહેશે. ગુજરાત, સૌરાષ્ટ્ર, કચ્છ, મહારાષ્ટ્ર અને ગોવાના ઘણા વિસ્તારોમાં હળવોથી મધ્યમ વરસાદ પડી શકે છે, જ્યારે કેટલાક સ્થળોએ ભારે વરસાદની પણ શક્યતા છે. આ સિવાય કેરળ, કર્ણાટક, તેલંગાણા અને તમિલનાડુમાં પણ વરસાદી માહોલ રહેશે.

ચોમાસું બરાબર જામ્યું હોવાથી પશ્ચિમ બંગાળના ઘણા જિલ્લાઓમાં 14 જુલાઈ સુધી ભારે વરસાદ ચાલુ રહેવાની સંભાવના છે. હવામાન વિભાગે દાર્જિલિંગ અને કાલિમ્પોંગના પહાડી વિસ્તારોમાં ભૂસ્ખલન તેમજ નીચાણવાળા વિસ્તારોમાં જળભરાવની આશંકા વ્યક્ત કરી છે. કોલકાતા, હાવડા અને હુગલી સહિતના જિલ્લાઓમાં પણ ભારે વરસાદ થઈ શકે છે. ઉત્તરાખંડમાં છેલ્લા 24 કલાકમાં થયેલા ભારે વરસાદને કારણે જનજીવન પ્રભાવિત થયું છે. અલગ-અલગ જગ્યાએ ભૂસ્ખલન થવાથી 2 રાષ્ટ્રીય રાજમાર્ગ સહિત કુલ 126 માર્ગો બંધ થઈ ગયા છે. દેહરાદૂનમાં એક દીવાલ ધરાશાયી થતાં મહિલા ઘાયલ થઈ છે અને એક અસ્થાયી પુલ પણ તૂટી ગયો છે.

રાજસ્થાનના મોટાભાગના વિસ્તારોમાં આગામી એક અઠવાડિયા સુધી ચોમાસું નબળું રહેવાની અને હવામાન શુષ્ક રહેવાની શક્યતા છે. છેલ્લા 24 કલાકમાં બુંદીના તાલેડામાં સૌથી વધુ 5 મિલીમીટર વરસાદ નોંધાયો છે. શ્રીગંગાનગરમાં મહત્તમ તાપમાન 41.7 ડિગ્રી સેલ્સિયસ રહ્યું છે. 14 અને 15 જુલાઈએ કેટલાક જિલ્લામાં હળવો વરસાદ થઈ શકે છે.