હવામાન@દેશ: 24 રાજ્યોમાં વરસાદની આગાહી, પવન સાથે ધૂળની ડમરીઓ ઉડશે

અટલ સમાચાર ડોટ કોમ, ડેસ્ક

ગુજરાત સહિત દેશભરમાં અંગ દઝાડતી ગરમી પડી રહી છે. આ તરફ અસહ્ય ગરમીને કારણે લોકો બપોરના સમયે જરૂરિયાત મુજબ જ બહાર નીકળી રહ્યા છે. આગામી દિવસોએ ધૂળનું તોફાન અને વરસાદ ગરમીથી રાહત આપશે.ભારતીય હવામાન વિભાગ (IMD) એ ચેતવણી જાહેર કરતાં કહ્યું છે કે, એક વાયુ ચક્રવાતી પરિભ્રમણ પશ્ચિમ રાજસ્થાન પર, બીજું દક્ષિણ મધ્ય પ્રદેશના મધ્ય ભાગ પર, ત્રીજું મન્નારના અખાત પર, ચોથું દક્ષિણ-પશ્ચિમ બંગાળની ખાડી અને નજીકના તમિલનાડુ પર અને પાંચમું પશ્ચિમ આસામ પર રચાય છે.

હવામાનની આગાહી પ્રમાણે આગામી 5 દિવસ સુધી ઉત્તરપૂર્વ અને પૂર્વ ભારતમાં વાવાઝોડા અને 40-50 કિમી પ્રતિ કલાકની ઝડપે ભારેથી અતિ ભારે વરસાદ પડશે. આજે એટલે કે 16 એપ્રિલે મધ્ય ભારત અને મહારાષ્ટ્રના મેદાની વિસ્તારોમાં વરસાદ અને ધૂળની આંધી આવશે. 17 એપ્રિલે બિહાર, નાગાલેન્ડ, મણિપુર, મિઝોરમ, ત્રિપુરામાં અને 16-17 એપ્રિલે આસામમાં વાવાઝોડા સાથે વરસાદ પડી શકે છે. ઝારખંડ, ઓડિશા અને મેઘાલયમાં 16-18 એપ્રિલ દરમિયાન વરસાદ સાથે કરા પડશે અને 50-60 કિમી પ્રતિ કલાકની ઝડપે પવન ફૂંકાશે.હવામાન અપડેટ મુજબ આજથી થી 20 એપ્રિલ દરમિયાન પશ્ચિમી હિમાલય પ્રદેશને પશ્ચિમી વિક્ષેપ અસર કરશે, જેના કારણે 18 થી 19 એપ્રિલ દરમિયાન જમ્મુ અને કાશ્મીર, લદ્દાખ, હિમાચલ પ્રદેશ અને ઉત્તરાખંડમાં 40-50 કિમી પ્રતિ કલાકની ઝડપે ભારે પવન સાથે વરસાદ અને કરા પડશે. 18 થી 20 એપ્રિલ દરમિયાન ઉત્તરપશ્ચિમ ભારતના મેદાની વિસ્તારોમાં વાવાઝોડા અને વીજળી પડવાની શક્યતા છે અને 30-40 કિમી પ્રતિ કલાકની ઝડપે પવન ફૂંકાશે. 16-17 એપ્રિલના રોજ રાજસ્થાનમાં છૂટાછવાયા ધૂળના તોફાન આવવાની શક્યતા છે.

આગામી 5 દિવસ દરમિયાન તમિલનાડુ, પુડુચેરી, દરિયાકાંઠાના આંધ્રપ્રદેશ, તેલંગાણા અને કર્ણાટકમાં વાવાઝોડા અને ભારે પવન સાથે વરસાદ પડી શકે છે. 17 એપ્રિલે કેરળમાં વરસાદ પડશે.આગામી 4 દિવસ દરમિયાન ઉત્તરપશ્ચિમ ભારતમાં મહત્તમ તાપમાન 2-4°C વધવાની શક્યતા છે, પરંતુ આગામી 3 દિવસ દરમિયાન ધીમે ધીમે 2-4°Cનો ઘટાડો થશે. આગામી 2 દિવસમાં મધ્ય ભારતમાં મહત્તમ તાપમાનમાં કોઈ ખાસ ફેરફાર થશે નહીં. આગામી 5 દિવસમાં મહારાષ્ટ્રના આંતરિક ભાગોમાં તાપમાન 2-3°C સુધી વધી શકે છે જ્યારે ગુજરાતમાં આગામી 2-3 દિવસમાં તાપમાન 2-3°C સુધી વધશે.