હવામાન@ગુજરાત: અંબાલાલ પટેલે આગામી 4 દિવસ સુધી ગરમીની આગાહી કરી, સાથે હવાનું જોર પણ રહેશે

અટલ સમાચાર ડોટ કોમ, ડેસ્ક

રાજ્યના વાતાવરણમાં પલટો જોવા મળી રહ્યો છે. ઘણા જિલ્લાઓમાં ભારે વરસાદ પડી રહ્યો છે. ઘણા જિલ્લાઓમાં ધીમીધારે વરસાદે પ્રવેશ કર્યો છે. વરસાદી માહોલ વચ્ચે પણ રાજ્યમાં ગરમીનું પ્રમાણે એટલું પણ ઘટ્યું નથી જેટલું વરસાદ બાદ થવું જોઇએ. જાણે ધરતી હજું પણ પાણી માગી રહી હોય. ત્યારે રાજ્યમાં આગામી દિવસોમાં કેવું વાતાવરણ રહેશે તે અંગે હવામાન નિષ્ણાંત અંબાલાલ પટેલે આગાહી કરી છે.

હવામાન નિષ્ણાંત અંબાલાલ પટેલે ગુજરાતમાં આગામી 4 દિવસ સુધી ગરમીની આગાહી કરી છે. આ સમયગાળા દરમિયાન રાજ્યના વિવિધ ભાગોમાં તાપમાન ઊંચું રહેશે, સાથે હવાનું જોર પણ અનુભવાશે. 5થી 9 જૂન દરમિયાન રાજ્યના અનેક વિસ્તારોમાં અણધાર્યા વરસાદી ઝાપટાની શક્યતા છે. 10 જૂન સુધી મુંબઈ અને મહારાષ્ટ્રના કેટલાક ભાગોમાં વરસાદની આગાહી છે.

12 જૂન બાદ સૌરાષ્ટ્ર અને દક્ષિણ ગુજરાતના વિસ્તારોમાં વરસાદની શરૂઆત થશે. બંગાળની ખાડીમાં લો પ્રેશર સર્જાવાને કારણે ગુજરાતમાં સારો વરસાદ પડવાની સંભાવના છે. 18થી 30 જૂન દરમિયાન રાજ્યમાં ભારે વરસાદની અપેક્ષા છે, જે ચોમાસાની મજબૂત શરૂઆતનો સંકેત આપે છે. આ આગાહી ખેડૂતો અને નાગરિકો માટે મહત્વની છે. જેઓએ વરસાદ અને ગરમીની પરિસ્થિતિને ધ્યાનમાં રાખીને તૈયારી કરવી જોઈએ.ભારતીય હવામાન વિભાગએ શુક્રવાર, 30 મે 2025ના રોજ ગુજરાતના ઉત્તર અને મધ્ય ભાગોમાં ગાજવીજ સાથે વરસાદની આગાહી જારી કરી છે.

ઉત્તર ગુજરાતના બનાસકાંઠા, પાટણ, મહેસાણા, સાબરકાંઠા, અને અરવલ્લી જિલ્લાઓમાં ગાજવીજ સાથે હળવાથી મધ્યમ વરસાદની શક્યતા છે. આ ઉપરાંત, ગાંધીનગર, ખેડા, અમદાવાદ, આણંદ, પંચમહાલ, દાહોદ, અને મહિસાગરમાં પણ 40-50 કિમી પ્રતિ કલાકની ઝડપે પવન સાથે વરસાદ પડવાની સંભાવના છે. આ હવામાનની સ્થિતિને કારણે ખેડૂતો અને નાગરિકોએ સાવચેત રહેવું જરૂરી છે, કારણ કે ગાજવીજ અને ભારે પવનથી નુકસાનની શક્યતા છે. IMDની આ ચેતવણીથી અમદાવાદ અને ગાંધીનગર જેવા શહેરી વિસ્તારોમાં પણ પાણી ભરાવાની સમસ્યા ઊભી થઈ શકે છે.