હવામાન@ગુજરાત: નવરાત્રિ દરમિયાન નડિયાદ સહિત અનેક વિસ્તારોમાં અંબાલાલ પટેલે ભારે વરસાદની આગાહી કરી

અટલ સમાચાર ડોટ કોમ, ડેસ્ક

ગુજરાતના હવામાનશાસ્ત્રી અંબાલાલ પટેલે નવરાત્રિ દરમિયાન વરસાદની આગાહી કરી છે. તેમના કહ્યા મુજબ 20 થી 22 સપ્ટેમ્બર દરમિયાન હળવો વરસાદ અને 25 સપ્ટેમ્બરથી 5 ઓક્ટોબર દરમિયાન રાજ્યના વિવિધ ભાગોમાં છૂટાછવાયા વરસાદની સંભાવના છે. ખાસ કરીને નડિયાદ અને આસપાસના વિસ્તારોમાં ભારે વરસાદની સંભાવના છે. અંબાલાલ પટેલે જણાવ્યું હતું કે 1 થી 3 ઓક્ટોબર દરમિયાન અરબી સમુદ્રમાં એક નવી હવામાન સિસ્ટમ સક્રિય થઈ શકે છે. પરિણામે, રાજ્યભરમાં વરસાદનો સમયગાળો જોવા મળશે, જેમાં ઘણા જિલ્લાઓમાં વાવાઝોડાની સંભાવના છે.

દક્ષિણ પશ્ચિમ ચોમાસાએ ગુજરાતમાંથી વિદાય લેવાનું શરૂ કરી દીધું છે. ચોમાસાએ સત્તાવાર રીતે કચ્છ અને ડીસાથી વિદાય લીધી છે. સામાન્ય રીતે, ચોમાસાને સંપૂર્ણપણે વિદાય લેવા માટે એક અઠવાડિયા લાગે છે.હવામાન વિભાગના નિયામક ડૉ. એ.કે. દાસના મતે, ઉપરી હવામાં ચક્રવાતી પરિભ્રમણ અને સક્રિય રીટ્રીટીંગ લાઇનને કારણે, ચોમાસાની વિદાય છતાં રાજ્યમાં વરસાદ ચાલુ છે. નવરાત્રિની શરૂઆતમાં હવામાન વધુ ખરાબ થવાની ધારણા છે. આ ચોમાસાની ઋતુમાં અત્યાર સુધી, ગુજરાતમાં સામાન્ય કરતાં આશરે 26% વધુ વરસાદ પડ્યો છે. રાજ્યમાં સરેરાશ 33 ઇંચથી વધુ વરસાદ નોંધાયો છે.