હવામાન@ગુજરાત: કાળઝાળ ગરમી માટે રહો તૈયાર, 27મી એપ્રિલ સુધી વરસાદની શક્યતા નહિવત્

અટલ સમાચાર ડોટ કોમ, ડેસ્ક

ગુજરાત સહિત દેશભરમાં તીવ્ર ગરમીનો પ્રકોપ વધી રહ્યો છે. ઘણા શહેરોનું મહત્તમ તાપમાન 40 ડિગ્રી સેલ્સિયસથી ઉપર છે. માત્ર દિવસો જ નહીં પણ રાતો પણ ખૂબ ગરમ થઈ રહી છે. દિલ્હીથી લઈને યુપી અને બિહાર સુધીના રાજ્યો તીવ્ર ગરમી અને હીટવેવથી ઝઝૂમી રહ્યા છે. ખાસ કરીને ઉત્તર પ્રદેશમાં મંગળવારે ભારે ગરમી જોવા મળી હતી. દેશનું સૌથી વધુ મહત્તમ તાપમાન 44.2 ડિગ્રી સેલ્સિયસ નોંધાયું હતું.

ભારતીય હવામાન વિભાગની નવીનતમ આગાહી મુજબ, આજે ઘણા રાજ્યોમાં તીવ્ર ગરમી અને ગરમીની સ્થિતિ યથાવત રહેશે; તેનાથી વિપરીત, ઉત્તરપૂર્વ અને પર્વતીય પ્રદેશોમાં વરસાદ, વાવાઝોડા અને વીજળી પડવાની ધારણા છે. ત્યારે ગુજરાતમાં આજથી આગામી 27મી એપ્રિલ સુધી હવામાન કેવું રહેશે તે અંગેની હવામાન વિભાગની આગાહી જાણો.હવામાન વિભાગના અમદાવાદ કેન્દ્રએ આપેલી માહિતી પ્રમાણે, આજથી 27મી એપ્રિલ સુધી ગુજરાતમાં ક્યાંય વરસાદની આગાહી નથી.

સૌરાષ્ટ્ર કચ્છ સહિત રાજ્યમાં હવામાન શુષ્ક રહેવાની શક્યતા છે. તાપમાન અંગે હવામાન વિભાગે જણાવતા કહ્યું કે, ત્રણ દિવસ ગુજરાતના હવામાનમાં કોઈ બદલાવ આવવાની શક્યતા નથી. જે બાદ બેથી ત્રણ ડિગ્રી તાપમાન વધવાની આગાહી કરવામાં આવી છે.ગુજરાતના દરિયાકાંઠાના વિસ્તારોમાં 24 અને 25 એપ્રિલ દરમિયાન ગરમ અને ભેજવાળી હવાને કારણે અસ્વસ્થતા રહેવાની સંભાવના છે. IMD અનુસાર, ભારતના ઉત્તરપૂર્વીય રાજ્યો, જેમ કે અરુણાચલ પ્રદેશ, આસામ અને મેઘાલયમાં ભારે વરસાદની સંભાવના છે. આ વિસ્તારોમાં 50થી 60 કિમી પ્રતિ કલાકની ઝડપે પવન ફૂંકાઈ શકે છે અને વીજળી પડવાનું જોખમ રહેલું છે.