હવામાન@ગુજરાત: રાજ્યના ચાર જિલ્લાઓ માટે આજે રેડ એલર્ટ, વાવાઝોડા સાથે વરસાદની આગાહી

અટલ સમાચાર ડોટ કોમ, ડેસ્ક

રાજ્યમાં કમોસમી વરસાદ પડી રહ્યો છે. ઉનાળામાં અષાઢ જેવી સ્થિતિ સર્જાઈ છે. છેલ્લા બે દિવસથી રાજ્યમાં વરસાદી માહોલ સર્જાયો છે. રાજ્યાના કેટલાક વિસ્તારોમાં એક ઈંચ સુધી વરસાદ પણ પડ્યો પણ હતો. વરસાદી માહોલ વચ્ચે હવામાન વિભાગે રાજ્યના ચાર જિલ્લાઓમાં વરસાદનું રેડ એલર્ટ આપ્યું છે. આ ઉપરાંત રાજ્યના અન્ય જિલ્લાઓમાં પણ ગાજવીજ સાથે વરસાદ પડવાની શક્યતા છે.ગુજરાતમાં વરસાદી માહોલ વચ્ચે હવામાન વિભાગે ફરી આગાહી કરી છે.

હવામાન વિભાગે રાજ્યના ચાર જિલ્લા જેમાં દક્ષિણ ગુજરાતના ભરૂચ અને સુરત તેમજ સૌરાષ્ટ્રના અમરેલી અને ભાવનગરમાં 24 કલાકમાં માટે વરસાદનું રેડ એલર્ટ આપ્યું છે. આ વિસ્તારમાં વાવાઝોડા, કાજવીજ સાથે વરસાદની આગાહી કરવામાં આવી છે. આ વિસ્તારોમાં પવનની ગતિ 60-70 કિલોમીટર પ્રતિ કલાકની રહેવાની હવામાન વિભાગે શક્યતાઓ સેવી છે.હવામાન વિભાગ પ્રમાણે આજે બુધવારના દિવસે બનાસકાંઠા, પાટણ, આણંદ, પંચમહાલ, વડોદરા, છોટા ઉદેપુર, નર્મદા,ડાંગ, નવસારી, વલસાડ, તાપી અને દમણમાં પવન સાથે વરસાદની આગાહી કરી છે.

આ ઉપરાંત સુરેન્દ્રનગર, રાજકોટ, મોરબી, ગીર સોમનાથ, બોટાદ, કચ્છ અને દીવમાં વરસાદની આગાહી કરી છે.આ સાથે મહેસાણા, સાબરકાંઠા, ગાંધીનગર, અરવલ્લી, ખેડા, અમદાવાદ, દાહોદ, મહિસાગર અને પોરબંદર દ્વારકામાં પણ ગાજવીજ સાથે વરસાદની આગાહી કરાઈ છે.IMD એ તેની આગાહીમાં કહ્યું છે કે પાકિસ્તાનના દક્ષિણ ભાગ અને રાજસ્થાનના દક્ષિણ-પશ્ચિમ ભાગમાં ચક્રવાત રચાઈ રહ્યું છે. આ ચક્રવાત સમુદ્ર સપાટીથી લગભગ 1.5 કિમી ઉપર ફેલાયેલો છે.