હવામાન@ગુજરાત: રાજ્યમાં બેવડી ઋતુનો ચમકારો, નલિયામાં સૌથી નીચું 17 ડિગ્રી તાપમાન નોંધાયું

અટલ સમાચાર ડોટ કોમ, ડેસ્ક

રાજ્યભરમાં હાલ એકસાથે બેવડી ઋતુનો અનુભવ થઈ રહ્યો છે, જેના લીધે સામાન્ય જનજીવન અને નાગરિકોના આરોગ્ય પર સીધી અસર પડી રહી છે. વહેલી સવારે અને મોડી સાંજે ગુલાબી ઠંડીનો ચમકારો વર્તાઈ રહ્યો છે, જ્યારે સૂર્યનારાયણના પ્રકોપ સાથે બપોરના સમયે ઉનાળા જેવી આકરી ગરમીનો અહેસાસ થઈ રહ્યો છે.હવામાન વિભાગના તાજા આંકડા મુજબ, કચ્છનું નલિયા 17 ડિગ્રી લઘુત્તમ તાપમાન સાથે રાજ્યનું સૌથી ઠંડુ શહેર બન્યું છે, જ્યારે દિવસ દરમિયાન રાજ્યમાં મહત્તમ તાપમાન 38 ડિગ્રી સુધી પહોંચવાની સંભાવના વ્યક્ત કરવામાં આવી છે.

વાતાવરણમાં ઉત્તર અને ઉત્તર-પૂર્વ તરફથી સૂકા અને ઠંડા પવનો ફૂંકાવાનું શરૂ થતાં લઘુત્તમ તાપમાનમાં ઘટાડો થયો છે, જે વહેલી સવારે ઠંડકનો અહેસાસ કરાવે છે. કચ્છ પંથકમાં આવેલા નલિયા ખાતે લઘુત્તમ તાપમાન ઘટીને 17 ડિગ્રી સુધી પહોંચી જતાં ત્યાં રાત્રે અને સવારે સારી એવી ઠંડી વર્તાઈ રહી છે. સવારે ઠંડક રહ્યા બાદ બપોર થતાં જ સૂર્યના આકરા કિરણોને પગલે પારો ઝડપથી ઊંચકાઈ રહ્યો છે. આજે રાજ્યના મોટાભાગના વિસ્તારોમાં મહત્તમ તાપમાન 38 ડિગ્રી રહેવાની શક્યતા હોવાથી નાગરિકોને બફારો અને આકરો તાપ સહન કરવો પડશે. દિવસ અને રાતના તાપમાન વચ્ચે લગભગ 20 ડિગ્રી જેટલો મોટો તફાવત સર્જાતાં લોકોમાં શરદી, ઉધરસ, તાવ અને વાયરલ ઇન્ફેક્શન જેવા કેસોમાં વધારો થવાની શક્યતા સેવાઈ રહી છે.