હવામાન@ગુજરાત: રાજ્યમાં તાપમાનનો પારો 39 ડિગ્રીએ પહોંચશે, નાગરિકોને કાળજી રાખવા સલાહ

અટલ સમાચાર ડોટ કોમ, ડેસ્ક

ચોમાસાની વિદાયની પ્રક્રિયા વચ્ચે હવામાન વિભાગ દ્વારા ગરમી અંગેની એક મહત્વપૂર્ણ અને ચિંતાજનક આગાહી કરવામાં આવી છે. રાજ્યના નાગરિકોએ હવે અસહ્ય ગરમી અને બફારાનો સામનો કરવા તૈયાર રહેવું પડશે. હવામાન વિભાગના જણાવ્યા અનુસાર, આગામી દિવસોમાં રાજ્યભરમાં ગરમીનો પારો નોંધપાત્ર રીતે ઊંચકાશે અને લોકો કાળઝાળ ગરમીનો અહેસાસ કરશે.હવામાન નિષ્ણાતોના મતે, હાલ રાજ્યમાં ઉત્તર-પશ્ચિમ દિશાના પવનો ફૂંકાઈ રહ્યા છે. આ પવનોની અસરના કારણે વાતાવરણમાં ભેજનું પ્રમાણ ઘટી રહ્યું છે અને તાપમાન સીધું ઊંચકાઈ રહ્યું છે.

રાજ્યના વિવિધ ભાગોમાં મહત્તમ તાપમાન 39 ડિગ્રી સેલ્સિયસ સુધી પહોંચી શકે છે. ખાસ કરીને સૌરાષ્ટ્રના રાજકોટમાં મહત્તમ તાપમાન 39 ડિગ્રી રહેવાનું અનુમાન વ્યક્ત કરવામાં આવ્યું છે, જેનાથી બપોરના સમયે આકરા તાપનો અનુભવ થશે.રાજ્યના મેગા સિટી અમદાવાદની વાત કરીએ તો, અમદાવાદમાં પણ મહત્તમ તાપમાન વધીને 37 ડિગ્રી સેલ્સિયસ સુધી પહોંચવાની શક્યતા છે. તહેવારોની મોસમ અને ગરબાની ખરીદી વચ્ચે અચાનક વધેલી આ ગરમીથી નાગરિકો અને ખેલૈયાઓ અકળામણ અનુભવશે. હવામાન વિભાગે લોકોને બપોરના સમયે સીધા તડકાથી બચવા અને શરીર પ્રવાહી જળવાઈ રહે તે માટે પૂરતા પ્રમાણમાં પાણી તથા પ્રવાહી આહાર લેવાની સલાહ આપી છે.