હવમાન@ગુજરાત: બનાસકાંઠાના પાંચ તાલુકાઓમાં ત્રણથી સાડા છ ઇંચ વરસાદ, દાંતીવાડામાં સૌથી વધુ 6.56 ઇંચ

અટલ સમાચાર ડોટ કોમ, ડેસ્ક

હવામાન વિભાગની આગાહી મુજબ ઉત્તર ગુજરાતના બનાસકાંઠા જિલ્લાના પાંચ તાલુકાઓમાં ત્રણથી સાડા છ ઇંચ વરસાદ ખાબક્યો હતો. જેમાં દાંતીવાડામાં સૌથી વધુ 6.56 ઇંચ, પાલનપુરમાં 5.08 ઇંચ, ડીસામાં 4.72 ઇંચ, વડગામમાં 3.28 ઇંચ, દાંતામાં 3.24 ઇંચ વરસાદ ખાબક્યો હતો. જેમાં રાત્રિથી સવારના 10:00 વાગ્યા સુધીમાં જ દાંતીવાડામાં એકધારો 6.56 ઇંચ વરસાદ ખાબકતાં ખેતરોમાં અને નીચાણવાળા વિસ્તારોમાં પાણી ભરાયા હતા.જ્યારે મહેસાણાના ખેરાલુમાં એક ઇંચ વરસાદ નોંધાયો હતો. તેમજ અન્ય તાલુકાઓમાં પણ નોંધપાત્ર વરસાદ વરસ્યો હતો. પાટણમાં પણ વરસાદને કારણે નીચાણવાળા વિસ્તારોમાં પાણી ભરાઈ ગયા હતા.

છેલ્લા 24 કલાક દરમિયાન જિલ્લાના આઠ તાલુકામાં સારો એવો વરસાદ નોંધાયો છે. જેમાં ઉમરાળા અને પાલીતાણા તાલુકામાં ત્રણ ઇંચ વરસાદ પડ્યો છે.દાંતીવાડા, પાલનપુર, ડીસા, વડગામ, દાંતા તાલુકાઓમાં શનિવારની રાત્રિથી વરસાદનો બીજો રાઉન્ડ શરૂ થયો હતો. જે સવારના 10:00 વાગ્યે વિરામ લીધો હતો. સાડા છ ઇંચ વરસાદને લીધે દાંતીવાડામાં ઠેર ઠેર પાણી ભરાયા હતા. જ્યારે વરસાદના પગલે પાલનપુરમાં આબુરોડ હાઈવે ઉપર પાણી ભરાતાં નાના વાહનચાલકો મુશ્કેલીમાં મુકાયા હતા.

મહેસાણા જિલ્લામાં હવામાન વિભાગના વર્તારા મુજબ રવિવારે વહેલી સવારથી પવનના સૂસવાટા સાથે મોટાભાગના વિસ્તારોમાં વરસાદી માહોલ જામ્યો હતો. જેમાં તાલુકાવાર ખેરાલુમાં એક ઈંચ, વડનગરમાં પોણો ઈંચ તેમજ ઊંઝામાં અડધો ઈંચ વરસાદ પડ્યો હતો. વરસાદને લઈ ત્રણેય તાલુકાના નીચાણવાળા વિસ્તારોમાં પાણી ભરાઈ જતા વાહનચાલકો અને સ્થાનિકો હાલાકીનો સામનો કરવો પડ્યો હતો.પાટણ શહેર સહિતના વિસ્તારોમાં રવિવારે વહેલી સવારથી મેઘરાજાની મહેર શરૂ થતાં છેલ્લા કેટલાક દિવસોના વરસાદી વિરામને કારણે પ્રવર્તિ રહેલી ઉકળાટભરી ગરમીમાંથી લોકોને રાહત અનુભવી ઠંડકનો અહેસાસ કર્યો હતો. જ્યારે શહેરના નીચાણવાળા વિસ્તારો સહિત રેલવેના પ્રથમ ગરનાળામાં વરસાદી પાણી ભરાવાની સમસ્યા સર્જાઈ હતી.