હવામાન@ગુજરાત: 50 તાલુકામાં 2.5 ઈંચ સુધી વરસાદ ખાબક્યો, આજે આ જિલ્લાઓમાં આગાહી

અટલ સમાચાર ડોટ કોમ, ડેસ્ક

ગુજરાતમાં સત્તાવાર રીતે ચોમાસાએ તબક્કાવાર વિદાય લેવાનું શરૂ કર્યું હતું. ત્યારે અચાનક જ વાતાવરણમાં પલટો આવ્યો છે. અરબી સમુદ્રમાં સાયકલોનિક સિસ્ટમ સર્જાતાં રાજ્યના મોટાભાગના સ્થળોએ આસોમાં અષાઢી માહોલક જોવા મળ્યો હતો. ગુરૂવારે કોડીનારમાં સૌથી વધુ અઢી ઈંચ સહિત 50 જેટલા તાલુકામાં હળવોથી મધ્યમ વરસાદ પડ્યો હતો. હવામાન વિભાગની આગાહી અનુસાર હજુ આગામી ચાર દિવસ વરસાદ મહલ રહેશે.

જેમાં આજે નવસારી, ડાંગ, વલસાડ ,દમણ, દાદરા નગર હવેલીમાં ભારે વરસાદની આગાહી કરવામાં આવી છે. જ્યારે અરવલ્લી,  ખેડા, અમદાવાદ, આણંદ, પંચમહાલ, દાહોદ, મહીસાગર, વડોદરા, છોટા ઉદેપુર, નર્મદા, ભરૂચ, સુરત, જૂનાગઢ,  અમરેલી, ભાવનગર, ગીર સોમનાથ, દીવમાં 30થી 40 કિલોમીટર પ્રતિ કલાકની ગતિએ પવન ફૂંકાવવા ઉપરાંત હળવોથી મધ્યમ વરસાદ પડી શકે છે. મોટાભાગના સ્થળોએ શુક્રવારે ગરબાનો છેલ્લો દિવસ છે.

શનિવારે નોમ-દસમ ભેગા હોવાથી કેટલાક આયોજકોએ ત્યારે પણ ગરબાનું કરેલું છે. પરંતુ દિવસમાં પણ વરસાદની આગાહીથી આયોજકો ચિંતામાં મૂકાઈ ગયા છે. ગુરુવારે વરસાદથી સૌરાષ્ટ્ર, દક્ષિણ ગુજરાતના અનેક સ્થળમાં પાણી ભરાઈ ગયા હતા. હવામાન વિભાગે ઘણાં રાજ્યોમાં ભારે વરસાદની આગાહી કરી છે. આગામી 3-4 દિવસ દરમિયાન કેરળ, તમિલનાડુમાં ભારેથી અતિભારે વરસાદ પડી શકે છે.