હવામાન@ગુજરાત: આગામી દિવસોમાં રાજ્યમાં માવઠું થશે કે ઠંડી વધશે? 24 જાન્યુઆરીથી ફરીથી ઠંડા પવનો ફૂંકાશે

અટલ સમાચાર ડોટ કોમ, ડેસ્ક
24મી જાન્યુઆરીથી ઉત્તર ભારતના કેટલાક વિસ્તારોમાં વરસાદની શક્યતા છે. અરબી સમુદ્ર પરથી હાલ ગુજરાત પર પવન ફૂંકાઈ રહ્યા છે. હાલ ગુજરાતમાં ઉત્તર પૂર્વથી પૂર્વના પવનો ફૂંકાઈ રહ્યા છે. છેલ્લા બે દિવસથી ગુજરાતના વાતાવરણમાં પલટો આવ્યો હોય તેમ લાગી રહ્યું છે. ગુજરાતના મોટાભાગના વિસ્તારોમાં તાપમાનમાં વધારો નોંધાયો છે. સોમવારે પણ ગુજરાતના મોટાભાગના વિસ્તારોનું તાપમાન ઊંચુ ગયું હતું. હવામાન વિભાગ પાસેથી મળતી માહિતી પ્રમાણે, સોમવારે નલિયા સૌથી ઠંડુગાર શહેર રહ્યું હતું.
નલિયામાં 10.5 ડિગ્રી લઘુત્તમ તાપમાન નોંધાયું છે. આ સાથે ભુજમાં 13.6, રાજકોટમાં 15.2, ગાંધીનગરમાં 16.7, અમદાવાદમાં 17 ડિગ્રી, વડોદરામાં 17.6 ડિગ્રી તથા સુરતમાં 18.6 ડિગ્રી લઘુત્તમ તાપમાન નોંધાયું છે.આખા ગુજરાતમાં ઉત્તર પૂર્વથી પૂર્વના પવન ફૂંકાઈ રહ્યા છે. આગામી દિવસોમાં રાજ્યનું હવામાન શુષ્ક રહેશે. ગુજરાતના હવામાનમાં લઘુત્તમ તાપમાનમાં બે દિવસ તાપમાનમાં કોઈ મોટો ફેરફાર નહીં થાય. પરંતુ બે દિવસ પછી તાપમાનમાં બેથી ત્રણ ડિગ્રીનો ઘટાડો નોંધાઈ શકે છે. અમદાવાદ અને ગાંધીનગરમાં આજે એટલે કે મંગળવારે 16 ડિગ્રી લઘુત્તમ તાપમાન નોંધાવવાની શક્યતા છે.
તાપમાનમાં વધારો નોંધાવવા પાછળનું કારણ જણાવતા તેમણે કહ્યું કે, પવનની દિશા બદલાવવાને અને વેસ્ટર્ન ડિસ્ટર્બન્સને કારણે તાપમાનમાં વધારો નોંધાઈ રહ્યો છે. બેથી ત્રણ દિવસમાં વેસ્ટર્ન ડિસ્ટર્બન્સ પસાર થઈ જશે જેના કારણે તાપમાનમાં બેથી ત્રણ ડિગ્રી તાપમાનમાં ઘટાડો નોંધાશે. હવામાન નિષ્ણાત અંબાલાલ પટેલે આગાહીમાં જણાવ્યું છે કે, '24 જાન્યુઆરીથી ફરીથી ઠંડા પવનો ફૂંકાવાની સાથે ઠંડી વધવાની શક્યતા છે. 27, 28, 29મી જાન્યુઆરીએ વાદળછાયું અને રાજ્યના કોઈક કોઈક ભાગોમાં માવઠાની શક્યતા રહેશે.'