હવામાન@ગુજરાત: અંબાલાલ પટેલે કરી કડકડતી ઠંડીની આગાહી, આ તારીખથી પડશે હાડ થીજવતી ઠંડી

અટલ સમાચાર ડોટ કોમ, ડેસ્ક

અંબાલાલ પટેલના જણાવ્યા અનુસાર, યુરોપ અને એશિયાના કેટલાક ભાગોમાંથી ફૂંકાતા ઠંડા પવનોએ ગુજરાત સહિત ઘણા વિસ્તારોમાં ઠંડીમાં વધારો કર્યો છે. આ ઠંડીનો દોર ટૂંકા ગાળામાં ચાલુ રહેશે. તેમની આગાહી મુજબ, 18 થી 20 નવેમ્બર સુધી રાજ્યમાં તાપમાનમાં થોડો વધારો થવાની ધારણા છે અને હવામાન મોટાભાગે શુષ્ક રહેશે.નવેમ્બરમાં દરિયાઈ પ્રણાલીઓ સક્રિય રહેવાની શક્યતા છે.

અંબાલાલ પટેલના જણાવ્યા અનુસાર, 19 નવેમ્બરની આસપાસ અરબી સમુદ્રમાં નીચા દબાણવાળી સિસ્ટમ બનવાની ધારણા છે. વધુમાં, 24 નવેમ્બરની આસપાસ બંગાળની ખાડીમાં એક ઊંડો ડિપ્રેશન બનવાની ધારણા છે. જેના કારણે દક્ષિણ ભારતીય રાજ્યોમાં ભારેથી અતિ ભારે વરસાદ પડી શકે છે. ડિસેમ્બરની શરૂઆતમાં બંગાળની ખાડીમાં બીજો એક ઓછો દબાણવાળો વિસ્તાર પણ બની શકે છે.આ ઋતુ રવિ પાક માટે અત્યંત અનુકૂળ રહેવાની ધારણા છે. ઘઉં અને જીરું સહિતના મહત્વપૂર્ણ રવિ પાક માટે સારું હવામાન રહેવાની ધારણા છે, જે ખેડૂતોને રાહત આપશે. ડિસેમ્બરની શરૂઆતથી, ખાસ કરીને 22 ડિસેમ્બર પછી, ઠંડા પવનો ફૂંકાશે. નિષ્ણાતો આગાહી કરે છે કે લા નીનાની અસરોથી જાન્યુઆરી સુધી ગુજરાત સહિત સમગ્ર ઉત્તર ભારતમાં વધુ તીવ્ર અને રેકોર્ડબ્રેક ઠંડી પડશે.

હવામાન વિભાગે સંકેત આપ્યો છે કે, આગામી અઠવાડિયામાં હવામાનમાં ફેરફાર થવાની સંભાવના છે. બંગાળની ખાડી અને અરબી સમુદ્રમાં વિકસિત બે હવામાન સિસ્ટમને કારણે તાપમાનમાં વધારો થઈ શકે છે. સમુદ્રમાંથી ગરમ અને ભેજવાળા પવનો ઓડિશા, છત્તીસગઢ, પૂર્વી મધ્ય પ્રદેશ, તેલંગાણા અને પૂર્વી મહારાષ્ટ્રમાં ફેલાશે, જેના કારણે તાપમાનમાં થોડો વધારો થશે.