હવામાન@ગુજરાત: જાન્યુઆરીમાં ઠંડીના બદલે ઉનાળાની અસર, રાજ્યમાં તાપમાનમાં અચાનક વધારો

અટલ સમાચાર ડોટ કોમ, ડેસ્ક

ઉત્તર પૂર્વ તરફથી આવતા પવનો અને વેસ્ટર્ન ડિસ્ટર્બન્સના કારણે લઘુતમ તાપમાનમાં વધારો નોંધાયો છે, અને ઠંડી ગાયબ થઈ ગઈ.હવામાન વિભાગના અનુસાર, બે દિવસ બાદ પવનની દિશા બદલાતા તાપમાન ફરી ઘટશે અને ઠંડી ફરીથી આવશે. ગુજરાતમાં છેલ્લા કેટલાક દિવસોથી હવામાનમાં અચાનક પરિવર્તન જોવા મળી રહ્યું છે. પવનની દિશા બદલાવ અને વેસ્ટર્ન ડિસ્ટર્બન્સના અસરકારક પ્રભાવને કારણે રાજ્યમાં લઘુતમ તાપમાનમાં વધારો થયો છે. હવે જાન્યુઆરીના દિવસોમાં પણ ગરમીનો અનુભવ થઈ રહ્યો છે, જ્યાં સામાન્ય રીતે ઠંડીનો માહોલ રહે છે.

હવામાન વિભાગના જણાવ્યા અનુસાર, હાલ ઉત્તર પૂર્વ અને દક્ષિણ પૂર્વ તરફથી આવતા પવનો રાજ્યમાં ગરમી લાવી રહ્યા છે. વેસ્ટર્ન ડિસ્ટર્બન્સના સતત અસરના કારણે લઘુતમ તાપમાન વધ્યું છે. શિયાળાના બીજા પખવાડિયામાં ઠંડીનો અનુભવ થવાને બદલે લોકો પંખા અને એસી ચાલુ કરવામાં મજબૂર થઈ ગયા છે. આગામી બે દિવસ સુધી હવામાનમાં મોટો ફેરફાર થવાની શક્યતા નથી. બે દિવસ બાદ વેસ્ટર્ન ડિસ્ટર્બન્સના અસર સમાપ્ત થતાં પવનની દિશા ફરીથી ઉત્તર તરફ વળશે, જે લઘુતમ તાપમાનમાં 2-3 ડિગ્રીનો ઘટાડો લાવશે.

એટલે કે શિયાળાની ઠંડી ફરીથી અનુભવાઈ શકે છે. રાજ્યના મહાનગરો સહિત અન્ય જિલ્લાઓમાં લઘુતમ તાપમાન યથાવત્ રહ્યું છે. છેલ્લા 24 કલાકમાં નલિયામાં સૌથી ઓછું લઘુતમ તાપમાન 10.5° સેલ્સિયસ નોંધાયું છે, જ્યારે અમદાવાદ અને વડોદરામાં 17° થી 17.6° સેલ્સિયસ તાપમાન નોંધાયું. રાજકોટમાં 15.2° સેલ્સિયસ અને સુરતમાં 18.6° સેલ્સિયસ લઘુતમ તાપમાન નોંધાયું છે.