હવામાન@ગુજરાત: રાજ્યના કેટલાક વિસ્તારોમાં માવઠાનું સંકટ, 30થી 40 કિલોમીટર પ્રતિ કલાકની ઝડપે પવન ફૂંકાઈ શકે

અટલ સમાચાર ડોટ કોમ, ડેસ્ક

રાજ્યના કેટલાક વિસ્તારોમાં માવઠાનું સંકટ તોળાઇ રહ્યું છે. આજે કચ્છ, બનાસકાંઠા અને સાબરકાંઠામાં છુટાછવાયા સ્થળોએ ગાજવીજ સાથે હળવાથી મધ્યમ વરસાદની આગાહી છે. 30થી 40 કિલોમીટર પ્રતિ કલાકની ઝડપે પવન ફૂંકાઈ શકે છે. કાલે રાજ્યના 14 જિલ્લામાં કમોસમી વરસાદનું એલર્ટ છે. કચ્છ અને સૌરાષ્ટ્રમાં અમરેલી, ભાવનગર અને ગીર સોમનાથમાં ગાજવીજ સાથે વરસાદ વરસી શકે છે. બનાસકાંઠા, મહેસાણા, સાબરકાંઠા, વડોદરા, દાહોદ અને અરવલ્લીમાં પણ હળવાથી મધ્યમ વરસાદની હવામાન વિભાગે આગાહી કરી છે.

વાતાવરણમાં પલટો આવતા આજથી ભીષણ ગરમીથી થોડી રાહત મળશે. શુક્રવારે અમદાવાદ, રાજકોટ સહિત સાત શહેરમાં ગરમીનો પારો 42 ડિગ્રીને પાર થયો પહોંચ્યો છે. શનિવાર 43.5 ડિગ્રી મહતમ તાપમાન સાથે ગાંધીનગર રાજ્યનું સૌથી હોટેસ્ટ સિટી રહ્યું . અમરેલીમાં 42.3, ભાવનગરમાં 41.6, વડોદરામાં 42.2 ડિગ્રી મહતમ તાપમાન નોંધાયું છે.શનિવારે હરિયાણા, પશ્ચિમ ઉત્તર પ્રદેશ અને દિલ્હી-એનસીઆર વિસ્તારોમાં ભારે પવન સાથે વરસાદ અને કરા પડવાની ચેતવણી પણ આપી છે. આ માટે હવામાન વિભાગે રેડ એલર્ટ જાહેર કર્યું છે. આ ઉપરાંત ઉત્તરાખંડ, હિમાચલ, પંજાબ, રાજસ્થાન, પૂર્વી મધ્યપ્રદેશ, છત્તીસગઢ, ઓડિશા અને દરિયાકાંઠાના આંધ્રપ્રદેશના વિસ્તારમાં ધૂળભરી આંધીની ચેતવણી આપવામાં આવી છે.

હવામાન વિભાગે આગાહી કરી છે કે, શનિવારે પણ ભારે પવન અને ગાજવીજ સાથે વરસાદ પડી શકે છે. 20 થી 40 કિમી પ્રતિ કલાકની ઝડપે ભારે પવન ફૂંકાય તેવી શક્યતા છે. વરિષ્ઠ હવામાનશાસ્ત્રી આર.કે. જેનામણીએ જણાવ્યું હતું કે, અરબી સમુદ્ર અને બંગાળની ખાડીમાંથી આવતા ભેજ અને પવનના મિશ્રણને કારણે વાવાઝોડા સાથે વરસાદની સ્થિતિ સર્જાઈ છે.